Headlines

नुवाकोट — नेपाली काँग्रेसले आगामी १५औँ महाधिवेशनलाई लक्षित गर्दै नयाँ क्रियाशील सदस्यता वितरणको प्रक्रिया नुवाकोटको शिवपुरी गाउँपालिका–४ सिक्रेमा औपचारिक रूपमा सुरु भएको छ। सिक्रेमा आयोजित नेपाली कांग्रेस वडा कार्यसमितिको औपचारिक कार्यक्रममा स्थानीय नेताहरू, कार्यकर्ताहरू र सर्वसाधारणको उपस्थिति थियो। कार्यक्रममा बोल्ने वक्ताहरूले क्रियाशील सदस्यता पार्टीको आन्तरिक लोकतन्त्र, पारदर्शिता र संगठनात्मक अनुशासनको महत्वपूर्ण आधार भएको उल्लेख गर्दै यसपटकको सदस्यता वितरण प्रक्रिया निष्पक्ष, समावेशी र व्यवस्थित हुने विश्वास व्यक्त गरे।

नेपाली काँग्रेसले मुलुकभर महाधिवेशनको तयारीसँगै संगठन विस्तार र पुनःसंरचनालाई प्राथमिकतामा राखेको छ। यही सन्दर्भमा नुवाकोट जिल्लामा पनि सबै पालिकाहरूमा क्रमिक रूपमा सदस्यता वितरण अघि बढाइने जनाइएको छ। प्रत्येक वडा र टोल तहमा पार्टीमा वास्तविक रूपमा सक्रिय रहेका व्यक्तिहरूलाई समेटेर संगठनलाई थप सुदृढ बनाउने लक्ष्य काँग्रेसले राखेको छ।

कार्यक्रममा स्थानीय नेताहरूले क्रियाशील सदस्यता केवल औपचारिकता नभई पार्टी भित्रको निर्णय प्रक्रिया, नेतृत्व चयन तथा संगठनात्मक क्रियाकलापमा प्रत्यक्ष सहभागिताको ढोका खोल्ने आधारभूत संरचना भएको बताए। उनले नुवाकोटमा वितरित सदस्यता समयमै, व्यवस्थित ढङ्गले र विवादरहित रूपमा सम्पन्न गर्ने प्रतिबद्धता पनि व्यक्त गरे।

यससँगै काँग्रेसले नुवाकोटका अन्य गाउँपालिका तथा नगरपालिकाहरूमा सदस्यता वितरणको तालिका मिलाउँदै छ, र निकट दिनहरूमा सबै वडामा यो प्रक्रिया सञ्चालनमा ल्याइने बताइएको छ।

प्रकाशित समय १७:१५ बजे